Ըստ պատմական աղբյուրների Բաղանիս գյուղը հիմնադրվել է հինգերորդ դարում:

Բաղանիս գյուղը մեր հայրենիքի դարպասը լինելուց զատ նաև պատմամշակութային հարուստ ժառանգություն ու պատմական անցյալ ունեցող գյուղ է: Բնակավայրը ավերվել է 1222-23թթ. թաթար-մոնղոլների արշավանքի հետևանքով: Այն սկսել է վերականգնվել 13-րդ դարի կեսերից:  Բաղանիսցիները գյուղը պաշտպանելու նպատակով կառուցել են ՙԿոռաբերդ՚ ամրոցը: Բաղանիսի Սուրբ Աստվածածին եկեղեցին կառուցվել է 10-րդ դարում: Կիսավեր վիճակում գտնվող այս պատմական հուշարձանն հայ ճարտարապետության ինքնատիպ գլուխգործոցներից է: Գյուղում իր նպատակին չի ծառայում նաև 1901թ. կառուցված Սուրբ Հավհաննես եկեղեցին:

 Բաղանիս գյուղը Իջևան-Նոյեմբերյան ճանապարհի 15-րդ կմ հատվածի վրա է: Բաղանիսը ղեկավարում է երիտասարդ և եռանդուն գյուղապետ Նարեկ Սահակյանը:

Հուլիսի 16-ին Տավուշի թեմի գերաշնորհ առաջնորդ Բագրատ Սրբազանը սահմանապահ Բաղանիսում էր: Համարյա մեկ դարյա ընդմիջումից հետո Բաղանիսում  առաջին անգամ պատարագ եպիսկոպոսական սուրբ և անմահ պատարագ մատուցվեց: 

Դարերի թոհուբոհով անցած այս գյուղի կոթողները և Տավուշի սահմանապահ գյուղերում ապրող մարդիկ վկայում են տավուշեցու քրիստոնեական հոգեկերտվածքի և մքարամաքուր նկարագրի մասին:

Ինչպես արդեն նշել ենք, Տավուշի թեմի առաջնորդ գերաշնորհ Բագրատ Սրբազանի առաջնորդությամբ մարզի բոլոր եկեղեցիներում՝ գործող թե խոնարհված, հնչում է եպիսկոպոսական Սուրբ և անմահ պատարագ: Տավուշի թեմի առաջնորդն Աստծուց ուժ, կարողություն ու զորություն խնդրեց սահմանապահ գյուղերը շենացնելու, հոգևոր կյանքը վերականգնելու, հոգևոր զարկերակը նորից բաբախեցնելու համար:

Հոգևոր կյանքից հեռացած Բաղանիսի Սուրբ Հովհաննես եկեղեցին վերադարձավ իր իսկատիպ կոչմանը և 80 տարի անց կրկին ապրեց քրիստոնեական շնչով և հոգով:

Կից ներկայացնում ենք նաև Իջևան ՀԸ-ի պատրաստած տեսանյութը: