Դեկտեմբերի 18֊ին Զալցբուրգի կաթոլիկ եղեղեցու արքեպիսկոպոս Ֆրանց Լաքները և Կենտրոնական Եվրոպայում Հայ Առաքելական եկեղեցու հայրապետական պատվիրակ Տեր Տիրան եպիսկոպոս Պետրոսյանը ղեկավարեցին «Հանուն Արցախի և Հայաստանի խաղաղության» էկումենիկ աղոթքը, Զալցբուրգի հայագետ Յասմին Դում-Թրագուտի և Պրո Օրիենտե էկումենիկ հիմնադրամի նախաձեռնությամբ:

COVID19-ի դեմ խիստ միջոցառումների պատճառով ներկա էին միայն մի քանի հավատացյալներ՝ ավստրիացիներ և հայեր, բայց խաղաղության աղոթքը Զալցբուրգի տաճարից առցանց հեռարձակվեց:

Աղոթքից առաջ հայագետը նկարագրեց Հայաստանում և Արցախում առկա իրավիճակը: Խաղաղության աղոթքի սկզբում արքեպիսկոպոս Լաքները հիշեց հայ եկեղեցու «առաքելական արմատները» վաղ քրիստոնեական ժամանակներից:

Իր քարոզում Տիրան սրբազանն ասաց, որ այս ընդհանուր աղոթքն ուղղված է Հայաստանի և Արցախի հանրապետություններին օժանդակությանը, և նաև հարևան պետությունների ու ժողովուրդների հետ «կայուն և խաղաղ գոյակցությանը»: Պատերազմի և խաղաղության միջև ընտրություն կատարելիս պետք է ընտրել «արդարության վրա հիմնված խաղաղությունը»:

Տիրան սրբազանը բարձր գնահատեց Ավստրիայի կառավարության, ԱԺ-ի և Ավստրիայի եկեղեցիների և բարեպաշտ ժողովրդի նվիրվածությունը Արցախի խաղաղությանը. ֊ «Թող Տերը պաշտպանի Ավստրիան, Հայաստանը և Արցախը և օգնի բնակիչներին պահպանել հավատքն ու սերը – ասաց Սրբազանը: Նա նաև անդրադարձավ զալցբուրգցի հայագետի «gibHoffnung» նախաձեռնությանն` ուղղված ՀԱԵ Տավուշի թեմի տարածք եկած արցախցի փախստականներին և պատերազմի զոհերին աջակցելուն:

Այս նախաձեռնությանն աջակցում է անձամբ Զալցբուրգի արքեպիսկոպոս Լաքները, որը նաև Ավստրիայի եպիսկոպոսներիի համաժողովի նախագահն է: