Տավուշի մարզի Բերդ քաղաքը երկար տարիներ, ավելի քան 70 տարի եկեղեցի չի ունեցել, արդեն երկու տարի է, ինչ քաղաքն իր հոգևոր բովանդակությամբ զարդարել է Բերդի Սուրբ Հովհաննես եկեղեցին: Բերդ քաղաքում Կիրակնօրյա դպրոցի բացումը վերածվել էր համաքաղաքային մեծ տոնի, նախնական դպրոց ընդունվելու հայտ է ներկայացրել ավելի քան 150 աշակերտ, Բերդի քաղաքապետ պարոն Հարություն Մանուչարյանի խոսքերով՝ ինքը նախ շատ ուրախ և հպարտ է որպես այս քաղաքի բնակիչ, որպես այս երկրի քաղաքացի, որ սահմանագոտում գտնվող այս գողտրիկ քաղաքում քրիստոնեական դաստիարակության նման կենտրոն է հիմնվել:

Բերդի Կիրակնօրյա դպրոցը հովանավորվում է բարերար Շանթ Թոբիի կողմից:

Բերդի տարածաշրջանի կիրակնօրյա դպրոցները գտնվում են տարածաշրջանի հոգևոր հովիվ արժանապատիվ Տեր Արամ քահանայի խնամքի ու հոգածության ներքո:
Գերաշնորհ Բագրատ Սրբազանի խոսքերով` այս դպրոցների գոյությունը Բերդի տարածաշրջանում առավել քան կարևոր է, Սրբազանը միշտ շեշտում է, որ տավուշեցին օժտված է քրիստոնեական բոլոր առաքինություններով, իսկ սահմանում ապրող, քրիստոնեական գիտելիքահենք արժեհամակարգով ապրող մարդուց ուժեղ տեսակ չի լինի մոլորակի վրա: